“Soos Piet Cillié (of Dante of Tom Stoppard of Koos de la Rey of wie ook al) gesê het …” Wil jy ook soms ’n sin so begin? Dan moet jy dadelik Die Groot Aanhalingsboek aanskaf. Die meeste van hierdie versameling van meer as 4 000 aanhalings, ingedeel in 59 temas, sal jy nie sommer agter enige klip of op die internet raakloop nie. Die boek bevat ook ’n kort omskrywing van elke aangehaalde persoon, met ‘n register agterin van wie wat gesê het.

’n Goed gekose aanhaling kan die sout van enige toespraak wees. Die Groot Aanhalingsboek word lank reeds erken as die standaardbron vir aanhalings in Afrikaans, en nou is hy nóg groter en nuttiger.

Afrikaanse sprekers of skrywers wil in die eerste plek Afrikaanse bronne ontgin, en die eerste uitgawe in 1986 het veral gekonsentreer op oorspronklike Afrikaanse aanhalings. Terselfdertyd wil hulle gevleuelde woorde uit die klassieke en wêreldtale ook in klinkende Afrikaans kan aanhaal. In die tweede, hersiene uitgawe in 1998 is aanhalings uit die wêreldletterkunde, -politiek, -kuns en ander terreine dus aansienlik uitgebrei.

In hierdie nuwe, bygewerkte uitgawe met bykans 4 500 aanhalings, ingedeel volgens onderwerp en met ’n indeks om naslaan te vergemaklik, het George Claassen byna ’n dekade se nuwe aanhalings ingesluit. Geboorte- en sterftedatums en identifiserende besonderhede oor die aangehaalde persone is ook toegevoeg. Voorwaar onontbeerlik vir enigeen wat op soek is na ’n gepaste aanhaling in Afrikaans.