My Voete loop na Wellington ... is 'n keur uit sketse wat in Beeld, Die Volksblad, De Kat en Rooi Rose verskyn het.

In hierdie bundel opwindende sketse neem die veelbekroonde skrywer haar lesers op reis: na Pelgrimsrus; die vergete dorpie Eselbank in die Sederberge; Paternoster aan die Weskus en Namibië. Sy reis ook verder: na die Skotse Hooglande, Buenos Aires met sy polsende tango, klein Griekse dorpies wat wit en blou en pragtig is. Die reise is te voet, per trein, per vliegtuig en selfs per besemstok! Scheepers het die vermoë om met die intimiteit van haar gewaarwordinge en die sensualiteit van haar belewenisse die leser deel te maak van reise na onbereikbare, ver plekke: Ons proe die kaas en olywe van Oia én die Nagmaalswyn en -brood in Wuppertal. En ons proe die mooiste Afrikaanse woorde want die reis lei soms ook binnetoe, na die verbeelding en denke.